කතාවේ ප්‍රධාන වීරයා සතීෂ්, උත්සව කළමනාකරුවෙක්. මේ සතීෂ් සල්ලි හිඟකමින් මිරිකිලා ඉන්න කාලයක්. පුරුදු විදියටම සතීෂ්, එයාගේ යළුවෝ දෙන්නා රවී, පාම්බු එක්ක විවාහ උත්සවයක වැඩ කළමනාකරණය කරන්න ගිහින් තිබුණා. මනමාලිය පැනලා ගිය නිසා හදිසියෙම විවාහය නතරකරන්න සිද්ද වෙනවා. ඒත් සුළු මොහොතකින් ආයෙත් විවාහය වැඩ කටයුතු සිද්ද කරන්න ගන්නවා. ඒ පැනලා ගිය මනමාලියගේ නංගිව මනමාලයගේ තාත්තා බය කරලා විවාහයට එකඟ කරගන්නවා. මේකෙන් වැඩියෙන්ම වේදනාවට ලක් වෙන්නේ සතීෂ්. මොකද මේ අලුත් මනමාලි සෝෆි, සතීෂ්ගේ පෙම්වතිය. සතීෂ් මේ විවාහය කඩාකප්පල් කරන්න සැලසුම් කරනවා. සතීෂ් බෙනීව(මනමාලයාව) පැහැරගෙන එයාගේ කාර් එකේ ඩිකියට දාගෙන වෙනත් තැනකට යනවා. සතීෂ් බෙනීගේ තාත්තගෙන් ලොකු මුදලක් ඉල්ලනවා. බෙනීගේ තාත්තා අන්බරසු ඒ මුදල දෙන්න එකඟ වෙනවා. ඔය අතරෙ සතීෂ්ට තවත් කරදරයක්. එයාගේ කාර් එක බෙනීත් එක්කම කාර් හොරෙක් හොරකම් කරගෙන යනවා. සතීෂ් රවී, පාම්බු එක්ක කාර් එක හොයමින් යනවා. අන්තිමේදී පාම්බුට කාර් එක හම්බවෙනවා. සතීෂ් එතනට එද්දි හොරා, හොරකම් කරපු බඩු කාර් එකට පටවමින් හිටියා. සතීෂ් හරිම වෙලාව බලලා හොරාගේ බඩුත් අරගෙන යන්න ගියා. කොහොම හරි බෙනීව පැහැරගත්ත නිසා විවාහය නතර වෙනවා. සෝෆිගේ අම්මා අන්බරසුගෙන් ගත්ත සල්ලි ගෙවලා දාන්න කියලා සන්තෝෂ් සෝෆිට සල්ලි බෑග් එකක් දෙනවා. අන්බරසු ඒ එයාගෙම සල්ලි එයාට දීලා තියෙන්නෙ කියලා දැනගන්නවා. සෝෆිගේ ගෙදරට ගිහින් සෝෆිගේ පවුලෙ අයට මරණ තර්ජනය කරනවා. ඒ නිසා සෝෆි සතීෂ්ව පාවලා දෙනවා. අන්බරසු සතීෂ්ට කෝල් කරලා එයාගේ පෙම්වතියව මරලා දානවා කියලා තර්ජනය කරනවා. සතීෂ්ට වෙන විසඳුමක් නැති නිසා සල්ලි ආපහු දෙන්න තීරණය කරනවා. ඒත් සල්ලි තිබුණේ සතීෂ් ළඟ නෙවෙයි. සල්ලි බෑග් එක කාර් එකේ ඩිකියෙම තියෙන්න දුන්නා. ඒත් මේ වෙද්දි රවී, පාම්බු කාර් එකෙන් ගමනක් යනගමන් හිටියේ. පහුවදා සතීෂ්ට පොලිස් ස්ටේෂන් එකකින් කෝල් එකක් ලැබෙනවා. රවී, පාම්බු පොලිසියේ ඉන්නවා, ඇවිත් එක්කගෙන යන්න කියලා. සතීෂ් ස්ටේෂන් එකට ඇවිත් රවීවයි පාම්බුවයි ඇප දීලා එලියට ගන්නවා. එයාලා දෙන්නගෙන් සල්ලි කොහේද කියලා ඇහුවම පාළු බංගලාවක හංගලා ආවා කියලා කියනවා. ඉතින් තුන්දෙනාම හනිකට ගිහින් සල්ලි හංගපු තැනින් අරගෙන එන්න යනවා. ඒත් ඒ වෙද්දි එතන සල්ලි මල්ල තිබුණෙ නැහැ. සතීෂ් එයාගේ යාළුවෝ දෙන්නව විශ්වාස කරේම නැහැ. ඒත් එකපාරටම පාළු ගෙදර ඇතුලෙන් මිනිගෙක් ඉන්නව පේනවා. ඒ වගේම සල්ලි බැග් එක ඒ ගෙදර ඇතුලට අදගෙන ගිය පාරවල් තිබුණා. බැලින්නම් පාළු ගෙදර ඇතුලෙ හිටිය හොරු කල්ලිය බෑග් එක හොරකම් කරලා. සතීෂ්ට එයාගේ පෙම්වතියව බේරගන්නවට වඩා කිසිදෙයක් වැදගත් වුනේ නැහැ. ඒ නිසා ඒ හොර කල්ලිය එක්ක රණ්ඩු කරන්න ගත්තා. හොර කල්ලියත්, සන්තානම්ගේ කල්ලියත් අතර වුණ කලබලයෙන් එක් අවස්ථාවකදි ඒ බංගලාවේ තිබුණ ඔට්ටු අල්ලන මැෂින් එකක් ක්‍රියාත්මක වෙනවා. නිකන්ම නෙවෙයි පොර කාගනිද්දි ඔට්ටු සල්ලි තියන තැනටම මේ සල්ලි බෑග් එක විසිවෙනවා. අවුරුදු 60ටත් කලින් මැරුණු අයගේ හොල්මන් මේ ගෙදර හොල්මන් කරන්න ගන්නවා. ඒ විතරක් නෙවෙයි මෙයාලව එයාලගේ හොල්මන් සෙල්ලමක තරඟකරුවන් කරගන්නවා. සෙල්ලම ඉවර නොකර ගියොතින්, පැනගන්න බැලුවොතින් නැත්නම් එයාලගේ නීතී කඩ කලොත් අනිවාර්යයෙන්ම මැරෙන්න වෙනවා. අන්බරසුට සල්ලි දෙන්න බැරි වුණ නිසා මේ වෙද්දි සෝෆිගේ ජීවිතයත් අනතුරක. සතීෂ් මේ සෙල්ලම සෙල්ලම් කරාවිද? සල්ලි උවමනා නම් ධෛර්යයත් උවමනා වෙනවා.

චිත්‍රපටියේ කතව දිහා බැලුවොත් Pizza, Naane Varuven, Squid Game, Jailer(රෙඩින් හරහා) කියන චිත්‍රපටිවල ආභාෂයන් එක් එක් අවස්ථා වලදි දකින්න පුළුවන්. මේ චිත්‍රපටය අධ්‍යක්ෂණය සහ රචනය කරන්නෙ එස්. ප්‍රේම් ආනන්ද්. මේ ඔහුගේ කුළුදුල් වෘත්තාන්ත සිනමා අධ්‍යක්ෂණයක්. මේ චිත්‍රපටය Stand Alone Sequel එකක් විදියටයි නිර්මාණය කරලා තියෙන්නෙ. ප්‍රේක්ෂක හා විචාරකයන්ගේ ඉතාමත් යහපත් ප්‍රතිචාර මීට ලැබුණා. ඒ වගේම ඉ.රු. කෝටි 41ක බොක්ස් ඔෆිස් ආදායමක් වාර්ථා කරනවා.

සන්තානම්, කාලයකදි කොලිවුඩ්වල අත්‍යාවශ්‍යම විකටයා. දැන් වීරයෙක් වුණ හින්දා ගමන පල්ලම් බහිමින් නගිමින් තියෙන්නෙ. සන්තානම්ට Parris Jeyaraj (2021) න් පස්සෙ හිට් එකක් වදින්නෙ මේ චිත්‍රපටයෙන්. මේ අතර මැදදි Dikkilona (2021)[OTT], Sabhaapathy (2021), Gulu Gulu (2022), Agent Kanayiram (2022) කියන චිත්‍රපටි කීපයම නිකුත් වුණා. කොහොම හරි මේ අවුරුද්දේ සැප්තැම්බර් 1 දා ආයෙත් සන්තානම්ගේ Kick (2023) නිකුත් වෙනවා. ආයෙත් අසාර්ථක වෙනවා. සන්තානම් වේලපහින්ම DD Returns වගේ ෆිල්ම් එකක් බලාපොරොත්තු වෙන්න එපා කියලා දැනුවත් කලා. ඉස්සරහට බලමුකෝ, අනිවාර්යයෙන්ම ප්‍රේක්ෂකයින් බලාපොරොත්තු වෙන ආකාරයෙන් නිර්මාණයක් ආයෙත් අරගෙන ඒවි.

A1 චිත්‍රපටිය බලලා තියෙනවා නම්, සන්තානම්, මාරන්, රෙඩින්, තංගදුරෛ, රාජේන්ද්‍රන් කියන මේ අයගේ සංයෝගය මොනතරම් හාස්‍යෝත්පාදක දර්ශනයක් නිර්මාණය වෙනවද කියලා අත්දකින්න ඇති. Parris Jeyaraj, Dikkilona චිත්‍රපටිවලත් මේ අයගේ සංයෝගය වඩා ක්‍රියාකාරී එකක් වුණා. ඉතින් මේ චිත්‍රපටියෙදිත් රෙඩින් කින්ග්සි, මාරන්, මොට්ටෛ රාජේන්ද්‍රන්, තංගදුරෛ එකතු වෙනවා. ඊට අමතරව ප්‍රදීප් රාවත්, FEFSI විජයන්, මුනිෂ්කාන්ත්, සයි දීනා, දීපා ශංකර් යන අය රඟපානවා. ස්වාමිනාදන්, අසල් කෝලාර්, ඕෆ්‍රෝ, මාස්ටර් සැන්ඩි, මදන් ගෞරි යන අය විශේෂ පෙනීසිටීමකට සහභාගී වෙනවා. මේ සඳහන් කරපු හැමෝම තමිල්නාඩුවේ ඉතාමත් ප්‍රසිද්ධ චරිතයන්.

අසල් කෝලාර් මීට කලින් Parris Jeyaraj චිත්‍රපටයට “Kaava Ulla, Mustaache Vestaache” ගීත ගායනා කරලා තියෙනවා. මෑතකදි Leo (2023) චිත්‍රපටයෙන් නිකුත් වුණ “Naa Ready” ගීතය රචනා කරලා, විජේ එක්කම ගායනා ගායනා කරලා තියෙනවා. ඒ වගේම කෝලාර්, දුල්කර් සල්මාන්ගේ King Of Kotha (2023) චිත්‍රපටයේ “Kotha Raja” රැප් ගීතයද ගායනා කර තිබෙනවා. පලමුවෙන්ම කෝලාර් ජනතාව අතරේ වඩාත් ජනප්‍රිය වෙන්නේ “Jorthaale” කියන ගීතයෙන්. මේ ගීතය රාඝවා ලෝරන්ස්ගේ Rudhran (2023) චිත්‍රපටයටද එක් කරගත්තා. ජොර්තාලේ ගීතයට සංගීතය සැපයුවේ මේ චිත්‍රපටයට සංගීතය ලබා දුන්න ඕෆ්‍රෝ විසින්මයි.

හැමදාම වගේ අදහස් දක්වන සහ බයිස්කෝප් සිංහලෙන් අපිත් එක්ක එකතුවෙලා ඉන්න හැමෝටම ආදරෙයි!

බුදු සරණයි! සියලු දෙවි දේවතාවුන්ගේ රැකවරණයි!